يعني ايه بقى تعويم الجنيه؟ بالبلدي كده يعني انت عندك محل وبتبيع أي حاجة ولنفترض بتبيع مثلا مناديل، بتشتري علبة المناديل دي ب 60 قرش وبتبيع علبة المناديل دي بجنيه وماشية معاك حلو وعلبة المنادبل محافظة على قيمتها وماشية في السوق حلو أوي والناس بتحب تشتري النوع ده منك..
شوية شوية وحصل إن فيه محل فتح جنبك بيبيع مناديل جديدة ونوع جديد وبدأ يبيعه بسعر أقل منك علبة المناديل بقى بيبيعها ب 40 قرش بدل جنيه..
شوية شوية الدنيا هديت عندك ومبقتش تبيع زي الأول.. هتضطر إن أول قرار ليك يكون انك تنزل سعر علبة المناديل دي وتبيعها ب 70 قرش مثلا عشان تقرب لسعر المحل اللي جنبك وعشان تقدر تنافسه وتحاول ترجع مبيعاتك زي الأول.. كده نسبة ربحك قلت وبقى عليك ضغط أكبر..
بعد فترة الضغط عليك هيزيد ... انت كواحد معندكش أي بديل تاني هتضطر بعد فترة تنزل السعر ل 50 قرش وشوية ممكن تنزله ل 40 قرش عشان تبين انك قادر تنافس وعشان تبين للناس انك لسه عايش وان محلك مابيخسرش والدنيا فل معاك ..
بس في الحقيقة انت بتخسر فعليا كل يوم وعارف ان هييجي عليك وقت وتفلس وتقفل المحل وعندك جوه كوم مناديل مش عارف تبيعها لأن الناس شايفة انك عمال تنزل سعرها بسرعة في فترة قليلة وبالتالي ده خلاهم يقولوا ان أكيد مناديلك قيمتها قلت واكيد مابقتش حلوة..
الخوف خلى الناس ماتشتريش منك اصلا وماشيين بمناديل المحل التاني... وبالتالي مبقاش ليك قيمة دلوقتي..
آخر قرار هتفكر فيه عشان تمشي نفسك وتلحق نفسك من الموت... هتعوم المناديل دي...
يعني ايه هتعومها؟!
يعني مش هتحددلها سعر ومش هتبيعها بسعر معين... لو حد دخل هتقوله عايز علبة المناديل دي بكام؟
هيقدرها هو بنفسه.. وهتسيبه يقدرها لأنك عايزه يشتري بأي سعر...
هيقولك 10 قروش.. هتقوله مبروك عليك ..
واحد غيره هيدخلك يقولك هشتريها ب 50 قرش... هتقوله حلال عليك...
واحد غيره هيقولك اشتريها بجنيه... هتقوله الله عليك...
وتقعد انت مع نفسك كده تحاول تحط من ده على ده عشلن تحاول تعوض خسارتك وتعرف تبيع أكتر وتحاول ترجع مبيعاتك زي الأول...
......
اهو ده بالظبط موقف البنك المركزي.. واضح انه وصل للمرحلة الأخيرة والقرار الأخير اللي لازم ياخده عشان يحاول ينقذ الموقف وهو قرار تعويم الجنيه..
تعويم الجنيه يعني البنك المركزي والدولة ترفع ايديها عن تسعير عملتها ويبقى سعر عملتها حر حسب العرض والطلب... وكل ده في سبيل حاجة واحدة.. انه يزود الصادرات ويقدر يجيب عملة صعبة ويسد العجز..
بس معروفة اقتصاديا وعالميا إن بعد أي قرار لتعويم العملة.. فيه اه احتمال ان الصادرات تزيد.. بس أكيد أكيد إن الواردات هتقل بسبب إنك عشان تشتري عملة صعبة هتدفع كتير جدا لأن عملتك هتبقى ملهاش تمن أصلا.. وده في حد ذاته هيبقى كارثة بكل المقاييس على كل فئات الشعب سواء مستورد كبير أو مستهلك غلبان هتوصله الحاجة بسعر خيالي مبالغ فيه..
يعني من الاخر مفيش سعر محدد للجنيه.. اللي هيحدد سعره هو اقتصاد البلد والحركة التجارية وحركة الصادرات لو هنقدر نصدر حاجة اصلا..
استعدوا ..
لو معاك أي مبلغ مادي اشتري بيه دهب ده أو فكر تستثمره في أي حاجة غير إنك تسيبه جنيهات ورق .. متخليش معاك فلوس سايبة كتير وحطها في أي أصول عشان تضمن ان قيمتها ماتقلش على الأقل لحد ما يبان ملامح لأي حاجة بخصوص العملة والاقتصاد...
لو ناوي تدخل فى اي حاجة جديدة أو مشروع.. أجله وخلي فلوسك جنبك لحد مايبانلها ملامح عشان محدش عارف اللي جاي هيبقى ازاي .. مش هسودها ف وشك وأقولك اللي جاي سواد... هقولك اللي جاي ملهوش ملامح.. اللى جاي عمره ما عدى على مصر قبل كده .. لا أبوك شافه ولا جدك ..
ربنا يحفظنا ويحفظ البلد دي عشان الغلابة اللي فيها..
